专家拆局：阿仙奴再嗒「糖」

靠助攻新人王

今晚英超压轴好戏，阿仙奴主场火併「拖肥糖」爱华顿。儘管「拖肥糖」自安察洛堤接手后稳步上扬，不过近年造访阿仙奴例冇运行，而且兵工厂踏入2020年未输过，新星布卡约沙卡更助攻停不了，可藉地利乘胜追击，上盘乃不二之选。

主场专剋爱华顿

今仗两名主帅阿迪达同安察洛堤，都係喺上年年尾差唔多时间接手球队，「肥安」执教爱华顿后取得5胜2和2负，所输两场对手係强队曼城同利物浦，呢位名帅确係成功止血，依家队波上番中游，甚至有机会争欧洲赛席位，果然有料到。

爱华顿前锋禾确特有伤未必出得，之前严重断脚嘅中场安祖高美斯奇迹康复今仗可候命，但冇踢3个月唔慌上力，加上佢哋近22次造访阿仙奴未赢过，包括近6次作客酋长球场输晒，「肥安」真係要谂谂计。

至于阿仙奴主帅阿迪达，佢球员时代登陆英超首间球会就係效力爱华顿，今仗係倒戈相向，自从「达Sir」接手，阿仙奴表现渐入佳境，尤其踏入2020年后，9场赛事取得5胜4和未输过，其中近3仗更加保持清白之身，防守力明显得到改善。

不过讲到最抢镜嘅，一定係新星布卡约沙卡，呢位18岁翼锋虽然今季客串左闸，但各项赛事已交出9次助攻，包括日前欧霸作客奥林比亚高斯妙传拿卡锡迪一箭定江山，仲劲过奥斯尔，随时又嚟料，佢哋既然主场专剋「拖肥糖」，今仗小让平半，上盘有买趁早。