摘要：近6次对赛全胜狼今晚英超快车上演一仗，「1哥」利物浦作客硬撼狼队。利物浦啱啱喺「双红会」赢波，而且连续7轮联赛冇失波，表现绝对攻守兼备，相反开初打出甚高水平嘅狼队近况回落，今场就算有地利亦难挡「红军」...
近6次对赛全胜狼
今晚英超快车上演一仗，「1哥」利物浦作客硬撼狼队。利物浦啱啱喺「双红会」赢波，而且连续7轮联赛冇失波，表现绝对攻守兼备，相反开初打出甚高水平嘅狼队近况回落，今场就算有地利亦难挡「红军」来袭，1.5倍客胜有买趁早。
红军近7场保不失
利物浦上场以2比0击败曼联后，开季22场联赛豪取21胜1和未输过，其中上场火併曼联完场前一刻，门神艾利臣比加直接助攻畀穆罕默德沙拿埋斋，精彩一幕成为一时佳话，除此之外，利物浦喺欧联、英足盃亦顺利过关，连带上月赢埋世冠盃，气势如虹，呢种正正係「冠军命」，何况「红军」自1990年后未尝英格兰顶级联赛冠军，就係嗰份对锦标嘅飢渴感，成为佢哋积分上纵然领先成条街，对任何对手仍然冇放软手脚嘅原动力。
「红军」最强之处，大家一定会谂係「埃及文明」锋线，不过斯维认为佢哋防守做到滴水不漏，先係强势弹出嘅关键。连同「双红会」在内，红军唔单止联赛13连捷，并已连续7场联赛保持清白之身，係自2008-2009年度球季曼联后（当年保持14场不失球），近10年来首支做到嘅球队，「空中霸王」华基尔云迪积克喺今季英超空中对抗成功率高达76.4%，係所有完成60次或以上对抗嘅英超球员中排第1，印证咗「进攻得人心，防守赢冠军」嘅定律。
沙迪奥文尼专恰狼队
另一边厢，一向遇强愈强嘅狼队，上场几经辛苦于落后2球嘅劣势下，反胜修咸顿3比2，防守唔够集中问题浮现。连同上场在内，狼队近6战赢得1场咁大把，当中包括上月输畀利物浦、喺英足盃第3圈重赛畀曼联踢出局，计状态实在麻麻。翻查纪录，利物浦一向唔赦狼队，近6次联赛交手「红军」全部赢晒，摆明係格食格，其中前锋沙迪奥文尼喺近2次联赛碰头，更加包办晒全部3个士哥，堪称狼队剋星，今场客胜值得捧场。
