专家拆局：阿仙奴鍊车旺半和

少帅斗智以稳为先

今晚英超圣诞新年快车第3站头场，爆发伦敦打吡，阿仙奴喺主场硬撼死敌车路士，焦点梗係落在两军少帅兼名宿阿迪达及林柏特身上。刚接手阿仙奴嘅阿迪达，複製曼城嘅中前场逼抢打法，变相稳住咗防线，车仔主帅林柏特近期改踢3421阵式，3中坚配上双翼衞协防，明显以稳行先，加上近年碰头上半场常未分高下，半场和值得再追。

阿迪达帮到兵工厂防线

阿迪达与林柏特球员时代都係打中场，以睇通大局同冷静见称。其中啱啱接手阿仙奴嘅新帅阿迪达，近年喺曼城担任助教跟哥迪奥拿学嘢，令佢坚重视「全民逼抢」，防守唔单止係后衞嘅责任，应该由中前场做起，呢点正係阿仙奴多年来搞唔掂防守不稳嘅主因。达哥上仗首度领军对般尼茅夫，虽然排出惯常嘅4231阵式，但前线嘅奥巴美扬、拿卡锡迪、雷斯尼尔逊及懒到出汁嘅奥斯尔，每逢失去控球权即涌上前做反抢，有效阻止对手进攻，仲有覆盖范围大嘅防中卢卡斯托拉拿殿后，大大减轻防线压力，就算最终打和1比1，达哥连称满意，加上中坚哥林张伯斯停赛期满复出，进一步巩固兵工厂防线。

林柏特变阵3中坚收效

另一边厢，车路士早前5场联赛4度败阵，表现反覆，林伯随即喺快车首站变阵3421主守阵式，用鲁迪格、葛特苏马及汤姆利出任3中坚，连同两翼衞瞻前顾后，令防线变得更稳，更以2比0击败由恩师摩连奴领军嘅热刺，可惜到第2站佢哋踢番主动抢攻，即以0比2输畀修咸顿，吸取教训后，今场造访死敌唔敢轻举妄动。翻查纪录，阿仙奴同车路士近9次正面交锋，各得2胜5和2负，当中有7次开出半场和，其中5次半场波胆为0比0，可见两军碰头初段都稳阵为上，而达哥同林伯都深明伦敦打吡嘅重要性，大家都唔想输波失威，半场和不妨追多铺。