专家拆局：弗赖堡细撼拜仁

主场坚硬淨

今晚德甲快车拜仁慕尼黑作客弗赖堡，拜仁想赢波追赶榜首，奈何伤兵太多，面对硬淨嘅主队唔易食，拜仁让到两球风险高，宁吼中位数3.5球细盘。

弗军踢出史上最佳开季

拜仁贵为德甲班霸，同总身价只係佢哋8分之1嘅弗赖堡相比本应强弱悬殊，但佢哋现时只多弗赖堡两分。弗赖堡踢出队史最佳开季战绩，15轮联赛后失波仲少过拜仁3球，主场遇强愈强已经5轮不败，赢莱比锡同和多蒙特都係坚挺赛绩，近两仗主场亦赢波兼保不失。上轮作客0比1不敌哈化柏林，表现其实喺对手之上，教练史特拉希都盛讚防守球员，只係前线未能把握。

拜仁大炒完不来梅士气好，加上会方宣布会喺一周内决定下半季边个执教，临时主帅弗利克要争取高层信任，球员支持佢当然会尽做。不过拜仁遇上伤兵潮，搞到近期3线作战只得14至15人可供调用，有主场之助尚可继续发威，作客就难免飘忽，近4场德甲作客只得1胜，好在查维马天尼斯可复出镇守后方，防线畀到较大安全感，但面对硬淨嘅弗赖堡冇大胜把握。