专家拆局：阿仙奴作法求反弹

艾美利保饭碗唔衰得

今晚欧霸盃F组第5轮大战，「1哥」阿仙奴主场迎战「3哥」法兰克福。阿仙奴近况坚曳，令主帅艾美利备受压力，为保帅位点都要赢番场争气波，而且近7次欧霸主场出击赢晒，今仗势搵法兰克福做炮灰博反弹，主胜捧得过。

阿仙奴真係头头碰着黑，各项赛事连续6场未赢过，包括上场联赛以2比2仅和护级球队修咸顿，上轮欧霸则喺末段畀甘马雷斯逼和1比1，唔单止畀球迷闹爆，亦有传高层开始考虑换帅，主帅艾美利都咪话唔惊。

好彩艾帅一向擅打欧霸盃，今届头4战取得3胜1和，目前阿仙奴喺F组位列榜首，领先标准列治及法兰克福4分，出线机会高唱入云，若果单计近7次欧霸主场出击，更录得全胜，可见佢哋嘅级数喺欧霸仍属超班之列。

法兰克福星散走晒样

法兰克福乃上届欧霸4强分子，可惜今夏流失大量主力，战斗力大幅下滑，今届欧霸头4轮只得2胜2负，包括首轮主场惨吞阿仙奴3蛋，上轮被标准列治2比1绝杀被追到同分。睇番呢支德甲球队客场特衰，连同欧霸外及联赛在内，近9场作客只得3胜6负，所赢嘅只係甘马雷斯、柏林联及圣保利等弱旅，今场造访急欲反弹嘅阿仙奴难偷鸡，主胜有计。