专家拆局：红军主场强势炸厂

边缘人担正博上位

今晚英联盃16强爆发大战，利物浦主场迎战阿仙奴。「红军」开季势头强劲，喺晏菲路球场出击更无人能挡，加上拉尔拉拿、拿比基达等「边缘人」要趁机争取表现，可赢客场脚软嘅阿仙奴晋级，主胜有计。

讲到今季英超最当红球队，非利物浦莫属，头10场联赛豪取9胜1和，包括日前反胜热刺2比1，相信除咗曼城之外，真係冇边队可以阻到佢哋，联赛、欧联冠军无疑係最大目标，但係唔代表佢哋唔重视英联盃！至少我觉得主帅高普会趁住英联盃，去考察一班副选球员嘅状态，例如拉尔拉拿、拿比基达、阿历士张伯伦、洛夫云等，佢哋呢排不时于联赛同欧联后备上阵都交到货，今仗难得担正，一定做番齣好戏。

阿仙奴客场软脚蟹

虽然大家都係出副选，但阿仙奴球员质素唔及「红军」，而且一向唔重视英联盃，尤其係面对英超球队，近年曾畀热刺、修咸顿等淘汰。何况佢哋係正宗「客场软脚蟹」，今季各项赛事打咗6场作客，只得2胜2和2负，单计近7次造访利物浦，仅得2和5负，真係未踢先怯。的确晏菲路球场嘅威力，非等閒之辈能顶得住，利物浦唔单止今季6场主场赢晒，跨季更係14连胜，上次未能喺晏菲路赢波，要数到今年2月中欧联闷和拜仁0比0，阿仙奴今仗凶多吉少，热捧「红军」主胜。