专家拆局：阿仙奴入球细买定菲

前线唔齐脚老鼠拉龟

今晚英超独脚戏，阿仙奴作客硬撼升班球队锡菲联。阿仙奴箭头拿卡锡迪未必出得，贵价新兵尼高拉斯比比沦为水货，单靠射手奥巴美扬数胡，造访做惯缩头乌龟嘅锡菲联，要入波唔容易，2.5球细盘有分头更值博。

连盃赛在内，阿仙奴近6仗豪取5胜1和，射手奥巴美扬今季各项赛事攻入8球，更当选上月英超最佳球员。不过箭头拿卡锡迪啱啱先好番，状态未够十足，主帅艾美利坦言仍未决定佢今仗能否披甲，贵价新兵尼高拉斯比比就仲未适应英超，加盟至今只係入得1粒12码，更经常失机同断缆，斋靠「羊羊」数胡点都争啲。

至于艾美利与王牌奥斯尔嘅关係，可谓扑朔迷离，艾帅开口埋口讚「奥烧」状态愈嚟愈好，但今季只係派佢出场2次咁大把，明显呢位前德国国脚早已不在计划之内，连同年轻翼锋雷斯尼尔逊因伤要抖到11月，令艾帅临场想加强进攻却缺乏变招。值得留意嘅係，阿仙奴喺各项赛事失咗11粒，防线唔算稳阵，客场出击唔敢乱攻。

锡菲联铁桶阵守得

另一边厢，升班球队锡菲联质素所限，几乎场场都做缩头乌龟，摆出铁桶阵死守，近4仗联赛加埋只失2粒，全开2球或以下，包括主场迎战火力强劲嘅「1哥」利物浦，只因门将甸恩轩达臣失误「疴蛋」至输0比1，证明佢哋守得两嘴。今仗主场迎战前列分子阿仙奴，一定照办煮碗，不如转捧有逾2倍分头嘅2.5球细盘好过。