专家拆局：拿玻里回勇摆擂台起塞

同晚另一场欧联16强首回合由拿玻里主场硬撼巴塞隆拿。巴塞今场阵容不整，而且近年喺欧联淘汰赛作客输多赢少，面对回勇嘅拿玻里难言必胜，拿玻里让球主胜捧得落手。

巴塞近年欧联淘汰赛客战唔掂

巴塞今届欧联喺F组虽以4胜2和不败姿态进身16强，不过上周举行嘅4场16强首回合，4支小组首名只有德甲嘅RB莱比锡能够作客赢波，其馀3场均由主队胜出，证明嚟到淘汰赛，主场因素绝不可忽视；事实上，巴塞对上8场欧联淘汰赛作客仅得1胜2和5负，当中近3届16强首回合先后输畀巴黎圣日耳门、打和车路士及里昂，连续3届都要等次回合返主场先赢波晋级，而且巴塞近9次喺欧联作客意甲球队只得1胜5和3负，包括前届8强次回合作客吞罗马3蛋惨被逆转，今场唔输已经收货。

巴塞除苏亚雷斯同奥士文尼迪比利养伤外，连「通天老倌」沙治罗拔图都伤埋，加上正选左闸佐迪艾巴肯定缺阵，今场须续由经验一般嘅小将祖尼亚费普担正。因受西甲特别条例加盟嘅丹麦前锋巴夫韦迪亦无法出战欧联。主队拿玻里喺加度素接手后渐入佳境，近7场获6胜1负，包括赢过祖云达斯、国米同拉素3巨头。伤愈复出嘅梅顿斯只要入多1球，就可追平前队友咸锡嘅121球队史纪录，今仗一定拚尽，让球主客和巴塞让一球，必捧拿玻里让球主胜。