推荐预测：曼城半场够爆厂

师徒对决阿迪达等学嘢

英超今晚补赛上演曼城主场斗阿仙奴。「兵工厂」领队阿迪达上年12月上任前，曾担任曼城主帅哥迪奥拿副手超过2年，今仗称得上「师徒对决」。曼城实力高之馀，强大兵力亦有利频密赛程下发挥，相信可先发制人，半场主胜值博。

阿迪达执教阿仙奴后表现唔曳，战术上亦带有「师傅」哥迪奥拿嘅影子，不过论领军功力同经验始终差啲，加上阿仙奴本身兵力输蚀，赛前更有中场卢卡斯托拉拿提早收咧，喺兵源紧拙下，一众主力1周2赛都要顶硬上，上场主场对韦斯咸，亦要到尾段靠一个带有幸运成分嘅入波奠胜，球员体力问题浮现，要执行阿迪达嘅高度紧逼踢法，相当困难。

迪布尼复出如虎添翼

曼城衞冕英超基本上无望，上场打吡战输畀曼联更惹来唔少批评，返主场自然要吐乌气。况且佢哋兵力强大，德国翼锋利莱辛尼已伤愈候命，上场缺阵嘅奇云迪布尼亦可复出，可谓如虎添翼。再者曼城主场向来剋住阿仙奴，近6次交锋均能成功「爆厂」，而且全部都係半场就领先，阿仙奴近期入局慢集中力不足，既然主胜冇乜肉食，转吼更好分头嘅半场主胜。