推荐预测：城南守细波困死首尔

02世盃兄弟内讧

今日韩职头场「02世盃兄弟之战」，FC首尔主场硬撼FC城南。虽然首尔连赢2场，但进攻组织冇乜章法，而且续借前锋阿历山大比锡倾唔掂数，城南开咧头3轮只失1球，防守固若金汤，要顶住首尔唔係难事，首选2.5球嘅入球细。

呢场波球圈中嘅焦点，就係首尔主帅崔龙洙同城南波士金南一，咁啱係2002年世界盃南韩打入4强嘅拍档，今场係佢两兄弟第一次率领后辈交手。论指挥经验，崔龙洙一定丰富过首季喺K联赛揸旗嘅金南一，但係讲到球队近况，首尔就未必好得过3战不败嘅城南嘞。

续借阿历山大比锡失败

贵为名牌球队，但首尔喺高层闩水喉情况下，主帅崔龙洙惟有继续食老本，倚重朴主永、高尧韩等老将，经验丰富但活力欠奉，首轮作客反输畀FC江原1比3，正正暴露出末段后劲不继嘅问题，就算之后连赢FC光州及浦项制铁，不过进攻组织杂乱无章，只係恃质取胜。而且首尔想延长借用星级前锋阿历山大比锡，可惜谈判破裂，佢喺7月就要回归所属嘅伊蒂哈德，呢位上季有10球进帐嘅射手，今季只出过1场咁大把，依家续借唔成，仲同主帅崔龙洙不和难望披甲，加埋奥斯马巴巴有伤，今场阵容唔算完整。

城南今季改由前南韩国脚金南一执教，虽然号称要踢进攻足球，打法本质仍以稳健防守为主，开咧头3轮联赛，城南取得1胜2和未输过，成为继「2哥」蔚山现代外，另一支保持不败身嘅球队，而且3场只失1粒，全开2球或以下，係今季联赛失球最少球队之一，硬淨到晕。城南今场有队长徐宝民、安泳奎及伊戈祖云奴域养伤，中后场出现3个调动，必定稳字行头，首尔随时老鼠拉龟冇碇埋手，2.5球嘅细盘乃不二之选，事实上城南有得受让，让球客胜亦值得捧场。